Itsas Gaindiko Campusaren lehen belaunaldia Boisera itzuliko da, bi hilabeteko ikaskuntza, ikerketa eta bizipen partekatuen ondoren EHUk agur esan die Itsas Gaindiko Campusaren Nazioarteko Prestakuntza Programan parte hartu duten Boise State Universityko bederatzi ikasleei. Esperientzia aitzindari honek bi unibertsitateen arteko lotura akademiko, zientifiko eta pertsonalak sendotu ditu.
Duela bi hilabete baino ez ziren iritsi Euskadira, ozeanoaren beste aldetik zetorren abentura akademiko bati ekiteko ilusioz eta jakin-minaz. Gaur, ordea, askoz gehiago daramate etxera: ikerketa-esperientzia berriak, lagun berriak, unibertsitatea ulertzeko beste modu bat eta etorkizunean hazten jarraituko duen nazioarteko lankidetza-sarea.
Donostiako Miramar Jauregiak hartu zuen Itsas Gaindiko Campusaren Nazioarteko Prestakuntza Programaren lehen edizioko agur-ekitaldia. Topaketak Boise State Universityko ikasleak, EHUko irakasle-ikertzaile mentoreak eta bi unibertsitateetako ordezkari instituzionalak bildu zituen, datozen urteetan sendotzea helburu duen esperientzia aitzindari honen balantzea egiteko.
Ekitaldiaren hasieran, Gotzone Barandika EHUko Transferentzia eta Nazioartekotzeko errektoreordeak, Koldo Callado Garapen Zientifiko eta Sozialeko zuzendariak, Todd Otanicar Boise State Universityko irakasleak eta Iñaki Goirizelaia EHUko errektore ohiak hitza hartu zuten. Guztiek nabarmendu zuten Euskadi eta Idaho lotzen dituen lankidetza estrategikoaren balioa, bai prestakuntzaren, bai ikerketaren eta nazioarteko mugikortasunaren ikuspegitik.
Hala ere, goizeko protagonista nagusiak ikasleak eta haien mentoreak izan ziren.
Saioaren unerik berezienetako batean, ikasleek eta EHUko irakasle-ikertzaile mentoreek elkarrekin partekatu zituzten azken bi hilabeteotan bizitako esperientziak. Proiektu zientifikoetan egindako lanaz harago, eguneroko bizitzak, ikerketa-taldeetan integratzeak eta Euskal Herriko kultura eta hizkuntza-aniztasuna gertutik ezagutzeak izan duten eragina azaldu zuten. Miranda L. Nelson ikasleak nabarmendu zuen bezala, «Euskadin azkar hitz egiten da, eta Amerikan baino astiroago bizi da».
Testigantzetan ideia bera behin eta berriz agertu zen: ikaskuntza noranzko bikoa izan dela. Ikasleek azpimarratu zuten lehen egunetik benetako ikerketa-proiektuetan parte hartzeko aukera izan dutela eta EHUko taldeek egin dieten harrera beroa. Mentoreek, berriz, adierazi zuten nazioarteko esperientzia horrek beraien ikerketa-taldeak ere aberastu dituela, ikuspegi berriak eta etorkizuneko lankidetza-aukerak ekarriz.
Programa honen barruan garatutako bederatzi proiektuek askotariko jakintza-arloak hartu dituzte: biomaterialak, ingeniaritza mekanikoa, ibai-ekologia, lehen hezkuntza, euskal kultura, minbiziaren ikerketa edo fabrikazio aurreratua, besteak beste. Horrek agerian uzten du programa honek duen izaera diziplinartekoa eta lankidetzan oinarritua.
Esperientziaren beste alderdi aipagarrietako bat Euskadiko testuinguru eleaniztunaren ezagutza izan da. Euskararekin, gaztelaniarekin eta ingelesarekin izandako eguneroko harremanak ikasleak hizkuntzek komunikazio-tresna izateaz gain identitatearen, kulturaren eta komunitatearekiko loturaren adierazgarri ere badirela hausnartzera eraman ditu.
Ekitaldi instituzionalari amaiera emateko, Joxerramon Bengoetxea EHUko errektoreak berretsi zuen unibertsitatearen konpromisoa Itsas Gaindiko Campusarekin eta bi erakundeen arteko lankidetza sendotzen jarraitzeko borondatea.
Amaiera artistikoa KIMU Txalapartaren eskutik etorri zen. Ikasle estatubatuarrek Euskal Herriko kulturaren adierazpenik berezienetako bat ezagutzeko aukera izan zuten. Emanaldiaren aurretik gogorarazi zen txalapartaren esanahi sinbolikoa: bi pertsonak elkarri entzunez, erantzunez eta elkarri lekua eginez erritmo bakarra sortzen dute. Elkarlanaren, konfiantzaren eta elkarrizketaren metafora ezin egokiagoa, Itsas Gaindiko Campusaren espiritua irudikatzeko.
Jardunaldia familia-argazkiarekin eta terrazan egindako topaketa informalarekin amaitu zen. Agur-ekitaldia baino gehiago, Euskadi eta Idaho lotzen dituen komunitate akademiko baten lehen urratsen ospakizuna izan zen; ezagutza, ikerketa eta pertsonak ozeanoaren bi aldeetan elkartzen dituen komunitate baten sorrera.
Laster, ikasleen eta mentoreen testigantzak ikusgai Datozen asteetan, eta bederatzi ikus-entzunezko kapsula argitaratuko dira, Boise State Universityko ikasleak eta EHUko haien mentoreak protagonista izango dituztenak. Testigantza horien bidez, komunitateak lehen pertsonan ezagutu ahal izango du lehen edizio honek izan duen inpaktu akademikoa, pertsonala eta gizatiarra, eta Itsas Gaindiko Campusaren etorkizuneko belaunaldientzat inspirazio izango den esperientzia partekatua.
Gaiari buruzko albisteak
HARPIDETU NEWSKAMPUS-EAN
eta gure azken berriak posta elektronikoz jasoko dituzu