ABEN Euroeskualdeak antolatutako mugaz gaindiko udako ikastaroan parte hartu du Euskampusek

Mugaz gaindiko komunikazio eleaniztuna: erronkak, praktikak eta ikuspegiak

Joan den asteartean, uztailaren 2an, Euskampusek parte hartu zuen Baionako Cité des Arts gunean egin zen mugaz gaindiko udako ikastaroan. Bertan, mugaz gaindiko testuinguruetan komunikazio eleaniztuna lortzeko metodologia aurkeztu zuen, Euskampus Bordeaux campuseko proiektu enblematikoetan garatua.

Arola Urdangarin AECT Akitania Berria Euskadi Nafarroa (ABEN) euroeskualdeko zuzendariak, eta Marie Heguy-Urain ikastaroko zuzendariak eman zioten hasiera ekitaldiari, eta ongi etorria eman zioten bai aurrez aurre bai linean zegoen audientzia ugariari. Irekiera ofiziala Javier Arakama Urtiagak egin zuen, Euskarabideko (Nafarroako Gobernua) zuzendari gerenteak, eta INGURA plataforma digitala aurkeztu zuen, helduen euskalduntzera bideratua eta lau hizkuntzatan (euskara, frantsesa, gaztelania eta ingelesa) eskuragarri dagoena.

160 parte-hartzaile baino gehiagorekin —formatu hibridoan—, jardunaldiak agerian utzi zuen gero eta interes handiagoa dagoela gure eskualdeetako hizkuntza-aniztasunaren kudeaketa profesional eta estrategikoan. Euskara, katalana, okzitaniera edo aranera bezalako hizkuntza gutxituekin hasi, eta frantsesa eta gaztelania bezalako hizkuntza hegemonikoekin buka, ingelesaren erabilera ahaztu gabe hizkuntza franko gisa, aniztasun horri modu inklusiboan nola leku egin izan zen eztabaidaren ardatza.

Eduki nabarmenen artean, Albert Branchadell irakasle (Bartzelonako Unibertsitate Autonomoa) eta Eskualdeetako edo Eremu Urriko Hizkuntzen Europako Gutunaren Adituen Batzordeko lehendakariordeak aztertu zuen tresna hori nola aplikatzen den Espainiako eta Frantziako estatuetan, gaurkotasun handiko ikuspegi juridiko eta politikoa emanez.

Ikastaroan erakundeetako, arlo akademikoko eta gizarte zibileko ordezkariak bildu ziren, eta komunikazio eleaniztunak mugaz gaindiko testuinguruetan planteatzen dituen erronkei eta aukerei buruz egin zuten gogoeta.

Ikus-entzuleek gehien baloratu zituzten hitzaldien artean egon ziren Marie-Hélène Hermand-en (Université Bordeaux Montaigne) hitzaldia; mugaz gaindiko erakundeen hizkuntza-paisaia digitalari buruzko azterketa bat aurkeztu zuen hark, eta Eva Nossem-en (Université de la Grande Région - UniGR) ekarpena; border languaging kontzeptua eta ikerketan zein eguneroko bizitzan duen aplikazioa jorratu zituen hark. Mahai-ingurua amaitzeko, Estitxu Garai UPV/EHUko Bizkaiko Komunikazio eta Campuseko errektoreordeak gogoeta egin zuen erakundeetako hizkuntza-plangintzari eta marka-identitatearen kudeaketari buruz.

Egitarauan, halaber, Etxepare Institutua, AECT Euroeskualde Pirineo Mediterraneoa bezalako erakundeetako ordezkariak izan dira, bai eta eleaniztasunaren balorazioan diharduten enpresa eta elkarte eragileak ere.

Euskarak, Euroeskualdeko hiru lurraldeetan hizkuntza komuna denak, leku garrantzitsua izan du elkartrukeetan, komunikazio bektore komun gisa. Hala, Hego eta Ipar Euskal Herriko euskalki ezberdinak entzun ahal izan dira, mugaren alde bateko eta besteko loturak eraikitzen dituen hizkuntza gutxitu komun baten adiera aniztasuna agerian utziz.

Eleaniztasun instituzionalaren erronka nagusiak ere jorratu zituen programak: hizkuntzen hierarkizazioa, erakundeen arteko konpromiso desorekatua edo hizkuntza gutxituen presentzia digital eskasa. Hizkuntza anitzeko edukiak sare sozialen erritmo eta formatuetara egokitzeko zailtasuna azpimarratu zen, hizkuntza aniztasunak oraindik ere oztopo ugari baititu alor horretan.

Erronka horien aurrean, esperientzia praktiko eta berritzaile ugari aurkeztu ziren, eleaniztasuna komunikazioan, hezkuntzan edo identitate instituzionaleko estrategietan txertatzen dutenak. Hizkuntza-plan espezifikoekin hasi eta tresna teknologikoekin buka, hala nola, diktaketa-softwarea euskaraz, edo prestakuntza-ekimen batzuk, hala nola mugaz gaindiko proiektua EMPACTi3 edo mugaz gaindiko uda ikastaroa El Saltillo eskola-ontzian, irtenbide zehatzak eta errepikagarriak eskaini zituzten partekatutako proposamenak.

Itxaso Etxebarriak, bere aldetik, mugaz gaindiko komunikazio eleanitzaren metodologiari buruzko ponentzia bat aurkeztu zuen, adibide praktikoekin Euskampus-en modus operandia bere hedapenean irudikatuz, aniztasun eleanitzari buruzko kontzientzia sortuz, bai online, bai aurrez aurre. Ocean i3 mugaz gaindiko komunitaterako ad hoc sortutako Language Policy bezalako tresnak audientzian aurkeztu ziren ere.

Praktika eleaniztunei buruzko partaidetzako tailerra, Euskampus Fundazioak koordinatua.

Ikastaroaren helburuen ildotik, Euskampus Fundazioak parte-hartze sekuentzia bat jarri zuen abian, parte-hartzaile bakoitzak eleaniztasuna nola bereganatzen duen oinarri hartuta, jardunaldian partekatutako gomendioak eta jardunbide egokiak beren testuinguru profesionaletara nola eraman behar diren hausnartzeko.

Euskampuseko langileek (Komunikazio taldea eta Euskampus Bordeaux mugaz gaindiko campusaren buru den Iparraldeko taldea barne) gidatutako tailerrak hizkuntza-kudeaketan dauden oztopoak identifikatzeko gonbita egin zuen, bai eta parte hartu zuten erakundeetan modu sortzailean aplika daitezkeen ideia inspiratzaileak identifikatzeko ere.

Hizkuntza anitzeko ariketa izan zen, eta bertan zeuden hizkuntzen bat-bateko erabilera sustatu zen, itzulpen xuxurlatuko dinamiken eta esanahiaren eraikuntza kolektiboaren bidez.

Informazio gehiago mugaz gaindiko ikastaroari buruz hemen.

Partekatu